İrlandiya Məlumatların Qorunması Komissiyası (DPC); WhatsApp, Instagram və Facebook-un sahibi Metanın 275 milyon dollar cərimələndiyini açıqlayıb. Cəza 2021-ci ilin aprelində ortaya çıxan kütləvi məlumat sızması səbəbindən olub. Facebook-da baş verən hadisədə 533 milyon istifadəçinin məlumatları sızdırılıb.

2018-2019-cu illər arasında toplandığı bildirilən bu məlumatda istifadəçilərin adları, yerləri, doğum tarixləri və telefon nömrələri yer alıb. Meta, bunun ortaya çıxmasından sonra məlumatı sızdıran şəxsin 2019-cu ildə düzəldilmiş bir təhlükəsizlik açığı ilə məlumat əldə etdiyini söyləyib.

DPC də tezliklə araşdırmalar aparmağa və Facebook-un Avropa Ümumi Məlumatların Mühafizəsi Qaydalarını (GDPR) pozub-pozmadığını araşdırmağa başlayıb. Qanuna əməl olunmadığı müəyyən edildikdən sonra indiki cəza verilib.

276 milyon dollarlıq cərimə DPC-nin bu il Meta ilə bağlı üçüncü cəriməsidir. Tənzimləyici ilk dəfə 2018-ci ildə təxminən 30 milyon Facebook istifadəçisinin məlumatlarını ifşa edən məlumat pozuntusundan sonra mart ayında 18,6 milyon dollar, Instagram-ın yeniyetmə məlumatlarının emalı ilə bağlı araşdırmadan sonra isə sentyabrda 402 milyon dollar cərimələyib. Bugünkü cərimə ilə səlahiyyətli orqanın bu il şirkətə tətbiq etdiyi cərimələrin məbləği 700 milyon dollara yaxınlaşıb.